بيتزا سهلة وسريعة

بيتزا سهله وسريعه


المقادير (اللي هقولها تكفي عمل صينية ولو عايزة زيادة ضاعفي المقادير )

كوباية ونص دقيق

نص كوباية مية دافئ

معلقة خميرة بودر

رشة ملح ورشة سكر

زعتر وريحان مطحون بيدوا طعم خطير للبيتزا

مقادير صوص البيتزا

فص ثوم مفروم

معلقة صلصة

معلقة كاتشاب

معلقة زيت

ملح

كمون

ريحان

زعتر

شوية مية

شوية زيت صغيرين


الطريقة

نخلط الدقيق مع المكونات الجافة (الملح السكر الزعتر الريحان الخميرة )

بعدين نضيف المية وشوية زيت صغيرين جدا ونعجن كويس اوي بالعجانة او بادينا ولحد مالعجينة تبقي ما بتلزقش معاكي

لو لقتيها بتلزق ضيفي لها شوية دقيق

ونسيب العجين يخمر علي جنب

اثناء مالعجين بيتخمر

نوضب الحشوة بتاعة البيتزا

طماطم وفلفل اخضر وبصل متقطعين قطع صغيرة

وزيتون مخلي بس انا ما كانش عندي مخلي فقطعته عادي

وممكن تحطوا مشروم انا بحبه جدا بس نسيت احط منه المرة دي مع انه كان عندييا سلام

وممكن اي نوع بقي لحوم سوسيس بسطرمة فراخ تونة انشوجة اي حاجة بتحبيها انا ضيفت سوسيس

وجبنة طبعا ممكن تركي (رومي) او موتزاريلا بس انا يومها ما كانش عندي متزاريلا فحطيت تركي


ونجهز كمان الصوص بتاع البيتزا

المكونات اللي قولتها بنخلطها كلها مع بعض سهل جدا وطعمه جميل

والريحان والزعتر وبيدوا طعم رائع عشان كدة انا بحب اضيفهم للعجينة والصوص

بعد ما نخلص تجهيز مكونات البيتزا هتكون العجينة خمرت وبقت زي الفل

هنجيب صنية وندهنها زيت بسيط جدا جدا

ونجيب العجينة نفردها كويس في النصية وبعدين نضيف الصوص بتاع البيتزا

ولو لقيتي كمية الصوص كتير ما تحطيهوش كله بس انا بصراحة حطيته كله وكان جميل

بعد كدة نحط السوسي وبعديه الخضار الطماطم والفلفل والزيتون والبصل

وندخلها الفرن قبل ما تطلعيها من الفرن ضيفي لها الجبنة سواء تركي وا موتزاريلا

انا بحب الجبنة كتير فيها بس للاسف ما كترتش عشان الجبنة كانت حادقة اوي

وبكدة تكون جاهزة انا عملت جنبها بطاطس محمرة وسلطة كول سلو وطبعا الكاتشب والهوت صوص


وبالف هنا وشفا